لاہور: لاہور سمیت پنجاب کے مختلف شہروں میں بھارت کے 3 جاسوس ڈرونز تباہ کر دیئے گئے، جبکہ سندھ کے شہر گھوٹکی میں ڈرون کھیت میں گر کر تباہ ہوا، جس کے نتیجے میں ایک کسان شہید ہوگیا۔
پولیس ذرائع کے مطابق بھارت کی جانب سے لاہور میں والٹن کے علاقے میں اہم سکیورٹی ادارے کے دفتر کو ڈرون کی مدد سے اڑانے کی ناکام کوشش کی گئی، ڈرون کو قریب آتے دیکھ کر سکیورٹی اداروں نے فوری کارروائی کی۔
ذرائع کے مطابق 5 سے 6 فٹ کی پیمائش کا ڈرون سرحد پار سے آپریٹ کیا جا رہا تھا، ڈرون کو سسٹم جام کر کے گرا دیا گیا۔
ذرائع نے بتایا کہ حملے میں کوئی جانی نقصان نہیں ہوا اور نہ ہی کوئی شخص زخمی ہوا، تاہم عمارت کو جزوی طور پر نقصان پہنچا ہے، واقعے کے بعد علاقے میں سکیورٹی ہائی الرٹ کر دی گئی ہے۔
گوجرانوالہ کی حدود میں آنے والا بھارتی ڈرون بھی مار گرایا گیا، ڈرون کا ملبہ گجرات کے گاؤں جھنڈ پیر سے ملا۔
دوسری جانب چکوال میں تھانہ ڈھمن کی حدود میں دیوالیاں کے قریب ڈرون گر گیا، ڈرون گرنے سے کوئی جانی نقصان نہیں ہوا، ڈرون کا ملبہ قبضے میں لے گیا گیا، ڈرون طیارے کی شناخت کیلئے معائنہ کیا جا رہا ہے، قانون نافذ کرنے والےاداروں نے علاقے کو چاروں طرف سے سیل کر دیا ہے۔
اس کے علاوہ سندھ کے ضلع گھوٹکی کے گاؤں سرفراز لغاری میں ڈرون گرنے سے ایک کسان جاں بحق ، جبکہ اس کا والد زخمی ہوگیا۔
گھوٹکی کے سینئر سپرنٹنڈنٹ آف پولیس (ایس ایس پی) سمیع اللہ سومرو نے بتایا کہ ایک ڈرون گاؤں سرفراز لغاری کے علاقے میں گرا، یہ علاقہ کھنجو پولیس سٹیشن کی حدود میں ہے، جو بھارتی سرحد کے قریب ہے۔
ایس ایس پی نے جاں بحق ہونے والے شخص کی شناخت مختیار احمد اور زخمی کی شناخت ایدھن کے نام سے ہوئی، پاک فوج واقعے کی تحقیقات کر رہی ہے۔
سکھر کے ڈپٹی انسپکٹر جنرل (ڈی آئی جی) فیصل عبداللہ چاچڑ نے بھی واقعے کی تصدیق کی ہے۔
واضح رہے کہ 22 اپریل 2025 کو پہلگام میں سیاحوں کی ہلاکت کے بعد بھارت نے 6 اور 7 مئی کی درمیانی شب، اندھیرے میں پاکستان کے شہری علاقوں پر حملہ کرکے طبل جنگ بجا دیا تھا۔
